Бүгүн, балаҕан ыйын 10 күнүгэр, Дьокуускай куорат 390 сааhын көрсө, «Ырыа ыллыга» аллеяҕа үтүө ааттары үйэтитэр «Өйдөбүнньүк ыскамыайалар» бырайыак чэрчитинэн СӨ култууратын үтүөлээх үлэһитигэр, «Чороон» ансаамбыл биир бастакы салайааччытыгар, ырыаhытыгар, норуот инструменнарын маастарыгар Владимир Мохначевскайга уонна СӨ култууратын туйгунугар, мелодиһыгар, ырыаhытыгар Ангелина Файрушинаҕа анаммыт ыскамыайалар үөрүүлээх сүрэхтэниилэрэ буолла.

Тэрээһини илээн-саҕалаан ыытта СӨ култууратын туйгуна Мария Герасимова. Эҕэрдэ тылы эттилэр Дьокуускай куорат Строительнай уокуругун салалтатын салайааччыта Василий Рязанскай, Саха сирин норуоттарын музыкатын уонна фольклорун түмэлин методиһа Туйара Макарова, Владимир Мохначевскай огдообото, СӨ үтүөлээх артыыһа Валентина Чиркова, Ангелина Егоровна ийэтэ, педагогическай үлэ бочуоттаах ветерана, учууталлар учууталлара Ирина Ильинична Михайлова, суруналыыс, бэйиэт Иван Николаев-Уххан, бэйиэт, ырыа айааччы Виктор Хон-Омук Уола, общественник, Дыгын оонньууларын бастакы кыайыылааҕа Петр Макаров, СӨ култууратын үтүөлээх үлэһитэ, СӨ норуодунай суруйааччыта Наталья Михалева-Сайа, суруналыыс, фотограф, общественник, СӨ физическай культуратын уонна спордун туйгуна, үлэ ветерана Владислав Коротов.

Ыскамыайалар сүрэхтэниилэрин ырыаннан киэргэттилэр СӨ норуодунай артыыһа Владимир Татаринов, СӨ култууратын туйгуннара Эрчим, Алексей Потапов, Бүөккэ Бөтүрүөп, Рафаэль Крылатов, Ирена, Розалина Файрушиналар, СӨ култууратын үтүөлээх үлэһитэ Людмила Спиридонова уонна Строительнай уокурук женсоветын ансаамбыла.

Тэрийэр бөлөх бүгүҥҥү үөрүүлээх быһыы-майгы кыттааччыларыгар, бииргэ ылласпыт, үҥкүүлэспит көрөөччүлэригэр барҕа махталын тиэрдэр.