Саха сирин норуоттарын музыкатын уонна фольклорун түмэлигэр бэс ыйын 3 күнүгэр 15:00 ч. Саха Өрөспүүбүлүкэтин култуураҕа туйгуна, Саха сирин биллэр ырыаһыта, ырыа айааччы Ангелина Егоровна Файрушина 55 сылыгар аналлаах олоҕун уонна айымньылаах үлэтин сырдатар, кэрэһэлиир «Ийэ мичээрэ» диэн быыстапка арыллыытыгар Дьокуускай куорат олохтоохторун уонна ыалдьыттарын ыҥырабыт.
Ангелина Егоровна Файрушина Сунтаар улууһун Хадан нэһилиэгэр 1967 с. бэс ыйын 6 күнүгэр күн сирин көрбүтэ. Ангелина Егоровна айар үлэтин төрөөбүт дойдутуттан Хадан култуура дьиэтиттэн саҕалаабыта. 1986 с. «Айтал» театр-студияҕа солист, ырыаһыт быһыытынан сылдьыбыта. 1996-2007 сс. Сунтаар улууһун ырыа айааччыларын холбоһуктарын салайбыта, талааннаах мелодистары, биир санаалаахтарын түмэн олус таһаарыылаахтык үлэлээбитэ. «Долгун» араадьыйаҕа «Аартык» диэн бэйэтэ айбыт музыкальнай салону ыытара. Ангелина Файрушина саҥа саҕалаабыт, тахсан эрэр айар куттаах дьону өйөөн, үлэлэрин бар дьоҥҥо сырдатара.
Айылҕаттан айдарыылаах, ырыаһыт аналлаах буолан ураты ситиҥ иэйиилээх ырыалары айан ымыы гынан көтүппүтэ. 80-тан тахса ырыа, ордук чуолаан «Кыыс тойуга», «Сахам сирэ», «Ийэ мичээрэ» курдук ырыалар саха дьонун уоһуттан түспэккэ ылланар айымньылара буолбуттара. «Кыыс тойуга» ырыаҕа Ангелина Егоровна ырыаһыт аналлаах бу орто дойдуга кэлбитин кэпсээн, «Сахам сирэ» диэн тылларынан дойдуга тапталын, дириҥ ытыктабылын биллэрэн «Ийэ мичээрин» күүһүттэн айар суолун тирэҕин уурбута. Кини айан хаалларбыт ырыаларын биллэр эрэ ырыаһыттар буолбакка, улаханыттан кыратыгар, эдэриттэн-эмэнигэр тиийэ бары ыллыыллар. Ангелина Файрушина «Чуона» (1996) Өрөспүүбүлүкэтээҕи күрэскэ лауреат, ырыа айааччылар «Үрүҥ чөмчүүк» (1997), «Сир биһик» (2004), «Этигэн Хомус», “Саҥа ырыа” Саха сирин таһымнаах күрэстэргэ өрүү инники күөҥҥэ сылдьара, кыайыы өрөгөйүн билэрэ.
Тапталлаах Сахатын сирин бары олохтоохторугар аан бастаан 1998 с. «Дьылҕабар махтанабын» диэн айар киэһээтин бэлэхтээбитэ. Онтон 2001 с. Мирнэй уонна Дьокуускай олохтоохторугар кэнсиэр көрдөрбүтэ. Ийэ уонна дьиэ кэргэн сылларын чэрчитинэн 2008 с. Государственнай опера уонна балет театрыгар айар кэнсиэрэ буолбута. Ангелина Файрушина айар үлэтигэр кэнсиэринэн эрэ буолбакка, көрөөччүлэрин, истээччилэрин 2000 с. «Дьылҕабар махтанабын», 2006 с. «Айар саргым Сахам сирэ», 2008 с. «Ийэ мичээрэ» диэн ырыаларын хомуурунньуктарынан үөрдүбүтэ. Ону таһынан икки клип таһааттарбыта. Ангелина Егоровна өрүү аһымал кэнсиэртэргэ, араас акцияларга үөрүүнэн кыттара, дьоҥҥо-сэргэҕэ көмөлөһө сатыыра.
2001 с. Ырыа айааччыларын сойууһун чилиэнэ, 2006 с. сыралаах үлэтэ сыаналанан Өрөспүүбүлүкэ култууратын туйгуна үрдүк ааты ылбыта. Олоххо көхтөөх, айар куттаах киһи буолан куорат да, Өрөспүүбүлүкэ да бары тэрээһиннэригэр көхтөөхтүк кыттара, ылбаҕай ырыатынан дууһаны сылаамньытара, үтүөҕэ-кэрэҕэ кынаттыыра. Ангелина Файрушина айан хаалларбыт ырыалара үлэтэ үгүс истээччи кутун тутара, хас биирдии ырыата үтүөҕэ кынаттыыр, дойдуга тапталы күүһүрдэр, сырдыгы саҕар ураты күүстээхтэр.
Быыстапка арыллыытыгар кыттыыны ылыахтара Ангелина Егоровна Файрушина оҕолоро, аймахтара, биир дойдулаахтара уонна Эстрада тыйаатырын артыыстара.
Быыстапкаҕа туруохтара Ангелина Файрушина кэнсиэргэ кэппит көстүүмнэрэ, бэйэтэ тутта сылдьыбыт маллара, хаартыскалара, ырыанньыктара. Быыстапка бэс ыйын 29 күнүгэр дылы үлэлиэҕэ.
Быыстапка арыллыыта: Бэс ыйын 3 күнүгэр 15:00 ч.
Буолар сирэ: Саха сирин норуоттарын муусукатын уонна фольклорун түмэлэ, Киров уул. 31 дьиэтэ 3 этээс
Билсэр нүөмэргит: 35-38-84
Быыстапка Бэс ый 6-29 күннэригэр үлэлиэҕэ.
