Муус устар 13 күнүгэр Саха сирин норуоттарын музыкатын уонна фольклорун музейыгар «Доҕотторум ырыалара» диэн Владимир уонна Александра Кузьминнар дьиэ-кэргэнинэн дуэттарын камернай кэнсиэрдэрэ буолан ааста. Бу киэһэ Владимир уонна Александра Мэҥэ-Хаҥаласка олорон ааспыт ырыа куттаах доҕотторун ааттарын үйэтитэр, сырдатар сыаллаах, ырыа кэрэ эйгэтин дьоннорун ырыаларын ыллаан, кинилэри ахтан-санаан аастылар.
Ол курдук кэнсиэр ыалдьыттара Анастасия Варламова тылыгар уонна мелодиятыгар «Ахтыма, доҕоруом, эн миигин», Тамерлан Иванов мел., Степан Дадаскинов тыл. «Ыллыаҕыҥ нап-намыын ырыаны», Николай Афанасьев мел., Михаил Степанов тыл. «Мэҥэм сирин таптыыбын», Еремей Гоголев мел., Христофор Горохов тыл. «Эйиэхэ мин ырыа бэлэхтиим», Петр Васильев мел., Семён Капитонов тыл. «Эн үүнүүй, сардаана», Иван Аргунов мел., тыл. «Күн күлэр эн хараххар», Николай Сорокин мел., Марфа Куличкина тыл. «Ыйдаах түүн», Николай Устинов мел., Анастасия Устинова тыл. «Дьол вальса», Виталий Андросов мел., Павел Соловьев тыл. «Сибэкки биһикки», Семен Романов мел., тыл. «Саҥа дьылынан» ырыаларын иһиттилэр.
Владимир ахтарынан, кини бииргэ алтыспыт айар куттаах доҕотторун ырыалара күн бүгүҥҥэ дылы уостан түспэккэ ыллана сылдьаллар. Онон бу ырыа киэһэтэ Мэҥэ Хаҥалас улууһун ырыа айааччыларыгар ананан музей иһигэр дьиэрэйдэ.
Бу күн ырыа эрэ ылламмата, Александра уонна Владимир доҕотторо, аймахтара, биир идэлээхтэрэ кэлэн эҕэрдэлээн, үөрүүлэрин үллэсстэн, тэҥҥэ ыллаһан, дуоһуйан сынньанан тарҕастылар.