Кулун тутар 23 күнүгэр Саха сирин норуоттарын музыкатын уонна фольклорун түмэлигэр Саха Өрөспүүбүлүкэтин норуотун маастардара Тамара уонна Александр Игнатьевтар  «Икки сүрэх иэйиитэ, талба талаан кэрэтэ» диэн анал быыстапкалара арыллыаҕа.

Сунтаартан төрүттээх ураты талааннаах Игнатьевтар дьиэ-кэргэн Республика (Дьокуускай, Сунтаар, Нюрба, Майа уо.д.а.), Россия (Москва, Горно-Алтайскай, Хабаровскай), аан дойду (США, Франция, Турция, Казахстан, Кытай) таһымнаах араас фестиваллар уонна куонкурустар кыттыылаахтара.

Тамара Афанасьевна Сунтаар улууһун Куокуну нэһилиэгиттэн төрүттээх. Орто оскуоланы ситиһиилээхтик түмүктээбитин кэннэ Сунтаарга бытовой комбинат сувенирнай сыаҕар маастарынан үлэтин саҕалаабыта. Бу кэмҥэ Тамара Афанасьевна биригээдэтэ үрдүк көрдөрүүлээх буолан Комсомол наҕараадатын ылар. 1994 сылтан саҕалаан Политехническай лицейга маастар-педагогунан үлэлиир. Тамара Афанасьевна туос иһит оҥоһуллар билимин лицеистэргэ үөрэппитэ, дириҥ билиитин үллэстибитэ.

Александр Иванович Сунтаар улууһун Сунтаар нэһилиэгиттэн төрүттээх. 1984 сыллаахха Дьокуускайдааҕы художественнай училищены «художник мастер» идэлээх бүтэрэр. Красносельскай художественнай училищетыгар үрдэтинэр курстарга үөрэнэн 4-с разрядтаах «ювелир-монтировщик» квалификацияны ылар. 2006 сыллаахха Саха государственнай педагогическай академиятын бүтэрэн  «уруһуй учуутала» диэн идэни баһылыыр.

Тамара уонна Александр билиҥҥи кэмҥэ урбаанынан дьарыктаналлар.

«Икки сүрэх иэйиитэ, талба талаан кэрэтэ» быыстапкаҕа          Игнатьевтар дьиэ-кэргэн оҥорон таһаарбыт араас маллара дьон көрүүтүгэр туруохтара: ат киэргэлэ, мас уонна туос иһиттэр, сахалыы көстүүмнэр, киэргэллэр, күннэтэ кэтиллэр мааны таҥастар уо.д.а.

Быыстапка арыллыыта: кулун тутар 23 күнүгэр 15.00 чаастан

Буолар сирэ: Саха сирин норуоттарын муусукатын уонна фольклорун түмэлэ, Киров уул. 31 дьиэтэ 3 этээс

Билсэр нүөмэргит: 35-38-84

Быыстапка кулун тутар ый 23 – 31 күннэригэр үлэлиэҕэ.