Бу сыл алтынньы 5 күнүгэр  Саха сирин норуоттарын муусукатын уонна фольклорун түмэлин дьиэтигэр композитор-мелодист, СР культуратын үтүөлээх үлэһитэ, СР профессиональнай үөрэхтээһинин туйгуна, Кэбээйи улууһун Бочуоттаах гражданина, Саха сирин Бастакы Президена Михаил Николаев Фондатын Лауреата, СР “Гражданскай килбиэн” бэлиэтин хаһаайына, Дьокуускай куорат, Саха сирин аҕыйах ахсааннаах Хотугу норуоттар Ассоциацияларын, Саха сирин олох-дьаһах хаһаайыстыбатын, үөрэх, нэһилиэктэр, тэрилтэлэр ГИМИН ырыаларын ааптардара, “Сибэкки биһикки” Духуобунас скверин, Республиканскай “Ырыа Күнэ” проектар, “Дьүһүй” сахалыы ырыа кулуубун ааптардара, тэрийээччитэ, саха ырыатын сайдыытыгар олук уурсубут общественнай деятель    А.К.Калининскай-Луҥха Өлөксөй 65 сааһын көрсө айар үлэтин кэрэһэлиир

“ЫРЫАМ АЙАР КУЙААРА…” быыстапкатын арыллыыта буолан ааспыта. Быыстапкаҕа А.К.Калининскай олоҕун уонна айар үлэтин сырдатар араас сыллардааҕы хаартыскалара, кинигэлэрэ, ырыаларын дискэлэрэ, байаана, кэнсиэргэ кэппит көстүүмнэрэ, сыралаах үлэтин сыанабыла — наҕараадалара о.д.а. турдулар.

Ол эрэн бу тэрээһин  биир күнүнэн муҥурдамакка 5 чыыһылаттан саҕалаан күн ахсын ырыаны сэҥээрээччилэри,  Алексей Кирилович айар үлэтин сыаналааччыларын түмэ турар. Ол курдук, аймах-билэ дьоно, доҕотторо, учууталлара, Тулагы ансаамбыла, Кэбээйи землячествота, Аҕыйах ахсааннаах хотугу норуоттар ассоциациаларын чилиэттэрэ, А.К.Калининскай өр сылларга үлэлэспит доруобуйаларынан хааччахтаах ырыа кэрэ эйгэтин дьоно о.д.а. кэлэн ыалдьыттаатылар. Кэлбит дьон быыстапканы олус сэҥээрдилэр,  авторы кытта тэҥҥэ ыллаан-туойан сүргэлэрэ көтөҕүлүннэ.

Бу тэрээһиннэр чэрчилэринэн бүгүн ол эбэтэр алтынньы 12 күнүгэр 15:00 ырыа куттаах сахабыт дьонун-сэргэтин  А.К. Калининскай-Луҥха Өлөксөйү кытта көрсүһүүгэ ыҥырабыт!!!

Буолар сирэ: Киров уул. 31 № дьиэтэ (3 этээс)

Билсэр төл: 35-38-84

Киириитэ: 100 солк.