Бүгүн, ол эбэтэр балаҕан ыйын 28 күнүгэр музей эрэ үлэһиттэригэр анаан Саха сирин норуоттарын муусукатын уонна фольклорун түмэлигэр «Киинэнэн музейнай экспонаттары оҥоруу кистэлэҥнэрэ» лекция уонна А.П.Решетникова методикатынан олоҥхо ис тутулун ырытыыга маастар кылаас буолан ааста. Кэлбит дьон санааларын үллэһиннилэр:
Мин бүгүн Саха сирин норуоттарын муусукатын уонна фольклорун түмэлин атыннык арыйдым. Урут хаста да сылдьыбытым, олус интэриэһинэй. Музей идэтигэр үөрэнэрим быһыытынан киинэнэн экспонаттары оҥоруу саҥа ньыматын биллим, олус сэргээтим. Үлэбэр тиийдэхпинэ олоххо киллэрэр бигэ санаа киирдэ. Ону таһынан бүгүн биһиги олоҥхо ис тутулун ырытарга сүбэ-ама ылан үөрэннибит. Музей эдэр үлэһиттэрэ А.П.Решетникова салалтатынан элбэх үлэни ыыталлара көстөр уонна уопуттарын киэҥник тарҕаталлара олус наадалааҕын тоһоҕолоон бэлиэтиэхпин баҕарабын. Музей үлэһиттэригэр инникитин — саҥа дьиэлэнэн, саха сирин норуоттарын культураларын, фольклордарын үөрэтэн, дьоҥҥо-сэргэҕэ сырдата, тарҕата туралларыгар баҕарабын!
К.К. Родионов (Мэҥэ-Хаҥалас улууһун
Бүтэйдээх нэһилиэгин духуобуноска түмэлин директора)
Бу дьыл балаҕан ыйын 28 күнүгэр Саха сирин норуоттарын муусукатын уонна фольклорун музейыгар А.П.Решетникова методикатынан П.Е.Решетников-Көһөҥө Бүөтүр «Күөнэ көҕөччөр аттаах күүстээх-уохтаах Күн Күндүлү бухатыыр» олоҥхотун ис тутулун ырытыыга маастар-кылаас ыытылынна. Курсаннар – музейнай переподготовка бара сылдьар музей үлэһиттэрэ — 3 бөлөххө арахсан, олоҥхо тиэкиһин тутулун, сюжет матыыбынан, орто дойду олохтоохторугар, аллараа дойду адьарайдарыгар араартаан, персонажтар ыллыыр ньымаларын уратыларын «дьиэрэтии», «кутуруу», «дэгэрэҥ», хоһоонунан, кэпсээнинэн толоруу, ырыа түһүмэҕин саҕаланыытын, түмүгүн араара үөрэннибит. Инникитин музейга үлэбитигэр олоҥхону үөрэтиигэ, ырытыыга, табыгастаах ньыманы туттуохпут диэн астынан тарҕастыбыт.
Ону таһынан эбээн норуотун фольклорун сырдата-тарҕата сылдьар Акулина Петровна Трайзе-Нулгынэч остуоруйаларынан быйыл күн сирин көрбүт оҕолорго аналлаах музейнай короткометражнай мультипликационнай киинэлэри хайдах таҥан оҥорбуттарын Музей үлэһиттэрэ сиһилии кэпсээн көрдөрдүлэр, үөрэттилэр.
Музей үлэһиттэригэр сыралаах үлэлэрэ түмүктээх буоларыгар, үрдүк ситиһиилэри баҕарабыт!
Слепцова Е.П. (Аан дойдутааҕы хомус түмэлэ),
Чирикова А.И. ( «Полюс холода» түмэл, Дьааҥы),
Захаров И.Н., Степанова Л.С. Васильева Х.М («Доҕордоһуу» түмэлэ, Уус-Алдан), Иванова С.А. (Кыраайы үөрэтэр түмэл, Ньурба),
Музыка уонна фольклор түмэлигэр мастер-класс туһалаахтык ааста.
Маастар-кылаас дириҥ ис хоһоонноох түмэли көрүүттэн саҕаланна. Саха омук олоҕор Аал луук мас философскай суолталааҕын өссө биирдэ илэ харахпытынан көрөн итэҕэйдибит. Дьон болҕомтотун ордук интерактивнай музыкальнай инструменнар, экспонаттар тартылар. Лекция саҕаланыытыгар Музыка уонна фольклор түмэлин сахалыы уонна эбээннии тылынан тахсыбыт Акулина Петровна Трайзе-Нулгынэч остуоруйаларынан оҕолорго аналлаах кылгас мультипликационнай киинэлэри оҥоруу ньыматын музей үлэһиттэрэ көрдөрөн сиһилии кэпсээтилэр. Ону таһынан Айыы Уолун туһунан документальнай киинэ — сценарийа, диктор тиэкиһэ уонна видеоматериаллара хайдах таҥыллан оҥоһуллубуттарын сэргии иһиттибит, көрдүбүт. Ол кэннэ түмэл директора А.П. Решетникова олонхо ис тутулун ырытыытын ньыматынан П.Е. Решетников-Көһөҥө Бүөтүр «Күн Күндүлү бухатыыр» олонхотун ырытарга холоннубут.
Куурус истээччилэрэ бүгүҥҥү күҥҥэ элбэҕи биллибит-көрдүбүт, онон махталбыт улахан.
Абрамова Е.Д., Ереемеева Н.А. (П.Х. Староватов аатынан кыраайы үөрэтэр түмэл, Бүлүү)
Васильева С.К., (Оҕо дыбарыаһа, Дьокуускай),
Семенова Е.П. (И.Н. Барахов аатынан түмэл, Үөһээ-Бүлүү),
Охлопкова О.Л., Пирожкова Г.И. («Доҕордоһуу» түмэлэ, Уус-Алдан),
Протопопова А.С. (И.М. Гоголев аатынан түмэл, Бүлүү).
