Олунньу ый 15 күнүгэр CР Национальнай библиотеката уонна Саха сирин норуоттарын муусукатын уонна фольклорун түмэлэ “Суруйааччылар куоластара үйэни уҥуордаан” диэн сонун тэрээһини ыыттылар.
Ааспыт үйэттэн саҕалаан саха культуратын, искусствотын уонна наукатын диэйэтэллэрин Ленинградтааҕы «Мелодия» звукорежиссера Геннадий Павлович Любимов виниловай пластинкаҕа араас сылларга устууларын эт кулҕааҕынан истэн, ону ырытыһар бырайыак улахан сэҥээриини ылла.

Сардаана Васильевна Национальнай библиотека историческай саалатыгар мустубут дьоҥҥо Д.К. Сивцев-Суорун Омоллоон, Л.А. Попов, М.Д. Ефимов, С.С. Васильев-Борогонскай, А.С. Сыромятникова уо.д.а тыыннаах куоластарынан айбыт айымньыларын аахпыттарын иһитиннэрдэ. Онтон, М.К. Аммосов аатынан Хотугулуу-Илиҥҥи бэдэрээлинэй үнүбэрситиэт Арассыыйа Бэдэрээссийэтин Хотугулуу-Илиҥҥи норуоттарын тылларын уонна култуураларын үнүстүтүүтүн тылбаас салаатын устудьуоннара (сал. М.П. Попова, фил.наука кандидата) сүрдээх дириҥ ис хоһоонноох ырытыылары, чинчийиилэри оҥорон иһитиннэрбиттэрэ бу тэрээһини научнай өттүнэн үрдэттэ.
Маны сэргэ, суруйааччыларбыт хоһоонноро ырыа буолан ылланнылар. Түмүккэ кэлбит дьон күргүөмүнэн А.А. Иванов-Күндэ «Төрөөбүт тыл» хоһоонун аахтыбыт. Бу истиҥ, сэргэх тэрээһини иилээн-саҕалаан дьоһуннаахтык үнүстүтүүт тылбаас салаатын устудьуона — Сибэкки Заровняева ыытта.
Бу бырайыак иккис чааһа ыам ыйыгар тэриллэрин сэргии уонна кэрэхсии истэн А.Г. уонна Н.К. Чиряевтар аат. Саха национальнай гимназиятын иһинэн үлэлиир түмэл салайааччыта Татьяна Жиркова тэрээһин ис-хоһоонун, иитэр-үөрэтэр, үйэтитэр кыаҕын уонна тэрилтэлэр икки ардыларыгар ситэрсэн биэрэр үлэ хайысхаларын бэлиэтээн туран эдэр ыччаттарга инникитин үүнэ-сайда туралларыгар уонна наука эйгэтигэр саҥа сонун арыйыылары, сиһилии чинчийиилэри оҥороллоругар сүбэ-соргу биэрдэ.

Варвара Обоюкова, музей методиhа.