«Уран иис»

маастарыстыба үрдүкү уһуйаанын

үөрэтэр–көрдөрөр методическай хабааннаах дискэтин сүрэхтэниитэ.

Күндү Сахабыт сирин олохтоохторун “Саха сирин норуоттарын музыкатын уонна фольклорун музейа” көҕүлээһининэн, Саха республикатын норуотун маастара, саха ииһин чинчийээччи, элбэх кинигэ автора, историческай наука кандидата М. К. Аммосов аатынан ХИФУ Хотугулуу – илиҥҥи норуоттар тылларын уонна култуураларын үөрэтэр институт доцена,  «Уран иис» маастарыстыба үрдүкү уһуйаанын салайааччыта Светлана Ивановна Петрова үөрэтэр–көрдөрөр методическай хабааннаах дискэтин сүрэхтэниитигэр уонна маастардар үлэлэрин билиһиннэрэр «Өбүгэ ииһин утума» быыстапка арыллыытыгар ыҥырабыт!

Билиҥҥи кэмҥэ саха дьахтарын иистэниитэ: саха таҥаһын тигии, ойуулаан-дьарҕаалаан быысапкалааһын, оҕуруонан тигии, кылынан өрүү, кыбытан–аттаран тигии дьон-сэргэ сэҥээриитин ылла, дьарыктаныах иистэнньэҥнэр элбээтилэр. Онон бу дискэҕэ сахалыы үгэс ииһин кистэлэҥнэригэр үөрэтэр маастар-кылаастар киирдилэр. Маастар кылааһы устарга ХИНТуоКүөИ фольклор уонна култуура кафедратын иһинэн тэриллибит С. И. Петрова салайар «Уран иис» маастарыстыба үрдүкү уһуйааныгар дьарыктанар  маастардар уонна иистэнньэҥнэр кыттан көмөлөстүлэр.

Дискэ саха үгэс буолбут ииһин култууратын интэриэһиргээччилэргэ, орто оскуола, орто анал уонна үрдүк үөрэх кыһаларыгар иис хайысхатын үөрэтэр учууталларыгар уонна биирдиилээн маастардарга ананар.

Буолар күнэ-дьыла: ахсынньы ый 23 күнэ, 15 ч.

Буолар сирэ: “Саха сирин норуоттарын музыкатын уонна фольклорун музейа”, Киров уул. 31№-дээх дьиэтэ, 3 этээс.

Билсэр тел.: 35-38-84