Видеоэкспонаты
  • Решаем вместе
    Расскажите, как музей может стать лучше? Ждём ваших предложений

  • Ыам ыйын 25 күнүгэр – республика үрдүнэн Ырыа күнэ бэлиэтэнэр
    21 мая 2019

    Бу үтүөкэн күнү композитор-мелодист, СР культуратын үтүөлээх үлэһитэ, СР профессиональнай үөрэхтээһинин туйгуна, Кэбээйи улууһун Бочуоттаах гражданина, Саха сирин Бастакы Президена Михаил Николаев Фондатын Лауреата, СР “Гражданскай килбиэн” бэлиэтин хаһаайына, Дьокуускай куорат, Саха сирин аҕыйах ахсааннаах Хотугу норуоттар Ассоциацияларын, Саха сирин олох-дьаһах хаһаайыстыбатын, үөрэх, нэһилиэктэр, тэрилтэлэр гимин ырыаларын ааптардара, “Сибэкки биһикки” Духуобунас скверин, Республиканскай “Ырыа Күнэ” проектар, “Дьүһүй” сахалыы ырыа кулуубун ааптардара, тэрийээччитэ, саха ырыатын сайдыытыгар олук уурсубут общественнай деятель   Алексей Калининскай – Луҥха Өлөксөйө 2013 сыллаахха тэрийэн бүтүн республика таһымыгар таһаарда.

    Саха ырыата сайдарыгар тус суолларын-иистэрин хаалларбыт, олохторун анаабыт дьон ааттара  ааттана, айымньылара ыллана туралларыгар Саха сирин норуоттарын музыкатын уонна фольклорун музейа үтүмэннээх үлэни ыытар. Музей олоҥхо ырыаларын-тойуктарын толорууга, норуот ырыаларын сөргүтүүгэ, саха ырыатын дэгэрэҥ, дьиэрэтии ньымаларын тилиннэриигэ, сайыннарыыга Аиза Решетникова «Олоҥхо уонна төрүт үгэс: култуура, сиэр-туом, ырыа-тойук алтыһыылара» (2016) диэн кинигэтэ күн сирин көрбүтэ, Никандр Тимофеев «Три стиля пения»(2012) уонна «Дьиэрэй саха тойуга» (2018) үөрэтэр диискэлэрэ тахсыбыттара, «Возрождение и воспитание эпической аудитории» республикатааҕы научнай-практическай конференция тэриллибитэ, ол түмүгэр методическай хайысхалаах кинигэ тахсыбыта уонна музейбыт биир саамай киэн туттар үлэтинэн П.А.Ойуунускай олоҥхотунан, Г.Г.Колесов толоруутугар «Дьулуруйар Ньургун Боотур» анимационнай мультикпыт буолар.

             Маны таһынан, Сахабыт сиригэр үлэлээн-хамсаан, айан-тутан ааспыт, музыка эйгэтигэр сүҥкэн кылааттарын хаалларбыт киэн туттар дьоннорбутун үйэтитэргэ араас хайысхалаах үлэ ыытыллар. Холобура, Грант Григорян, Марк Жирков, Феврония Баишева,Полина Розинскайа, Галина Кривошапко, Марыына Попова, Наталья Трапезникова, Александр Самсонов-Айыы Уола  уо.д.а. норуокка биллэр култуура дьонун анал киэһэлэрэ, быыстапкалар, видеоэкспонаттара оҥоһуллубуттара. Быйыл ырыаһыт бэйиэт Леонид Попов 100 сылыгар, композитор Валерий Ноев 80 сылыгар, Игорь Литвинов 80 сылыгар анаан араас хайысхалаах тэрээһиннэр буолуохтара. 

               Бу курдук саха ырыатын сайыннарарга, сөргүтэргэ үлэбит тэтимин түһэрбэккэ бары бииргэ тутуспутунан үлэлии-хамсыы сылдьыаххайыҥ диэн туран бу дьыл ыам ыйын 25 күнүгэр Саха сирин норуоттарын музыкатын уонна фольклорун музейыгар аһаҕас аан күнүн биллэрэбит! Кэлин, сылдьыҥ, ыалдьыттааҥ!

    Аадырыспыт: Дьокуускай куорат, Киров уул.31№-дээх дьиэтэ, 3 этээс.

    Билсэр т.35-38-84



    Author of the theme: Tonyc - freelance.ru/users/tonyc