Саха сирин норуоттарын музыкатын уонна фольклорун музейын төрүттээччи,  Бочуоттаах дириэктэрэ Аиза Петровна Решетникова уонна музей үлэһиттэрэ бэс ыйын 15 күнүгэр самаан сайыны уруйдуур «Ытык Таатта ыһыаҕар» ыалдьыттаан кэллибит.

Хадаайы түһүлгэҕэ сылга биирдэ түһэр Ытык алгыс сиэрин-туомун кэннэ, Таатта народнай театрын бастакы режиссера, САССР үтүөлээх артыыската И.М.Максимова, сахалартан бастакы балет солиһа, педагог, балетмейстер И.Д.Христофоров 100 сылларыгар аналлаах “Театр сомоҕолуур күүс” дьүһүйүүнү көрдүбүт. Ыһыах үөрүүлээх чааһыгар А.П.Решетникова Таатта народнай театрыгар Ирина Михайловна Максимова хартыынатын (Л.Д.Слепцова уруһуйа) уонна быыстапкаҕа туһаныллыбыт материаллары бэлэх уунна.

Ыһыах киэҥ далааһыннаахтык ааста, ол курдук, араас түһүлгэлэргэ сомоҕолоһуу оһуохайа, “Таатта үрэх үрдүгэр” Таатта улууһун талааннаахтарын эҕэрдэ кэнсиэрэ, атах оонньуута, хапсаҕай, мас тардыһыыта күрэстэр, кылыһахтаах кырыымпа маастара, самодеятельнай композитор А.И.Чахов 85 сааһыгар, Саха АССР культуратын үтүөлээх үлэһитэ, мелодист, артыыс И.И.Слепцов 95 сылыгар аналлаах «Умнуллубат көмүс ырыалар» норуот ырыатын аһаҕас күрэстэр, “Саргылаах сахам таҥаһа” саха таҥаһын түһүлгэтэ,  Таатта уонна Нам улууһун бочуоттаах олохтооҕо И.И.Тарбахов 75 сааһыгар аналлаах үрүмэ астааһыныгар күрэс, “Айар тыл аҕаларын аартыктарынан” народнай поэт С.Р.Кулачиков 115, поэт, прозаик Р.А.Кулаковскай төрөөбүтэ 105 сылларыгар аналлаах уус-уран ааҕыы-күрэс,  “Уран Уус” норуот маастардарын уонна уран тарбахтаахтар оҥоһуктарын атыы-быыстапката, күрэстэр буоллулар.

Ытык Таатта ыһыаҕын тэрийээччилэригэр барҕа махталбытын тиэрдэбит.