Бүгүн олоҥхолорун үйэтитэр сыаллаах Амма улууһун Сулҕаччы нэһилиэгин олохтооҕо Вера Егоровна Исакова Саха сирин норуоттарын муусукатын уонна фольклорун түмэлигэр ыалдьыттаата. Кини 2013 сыллаахха суруйбут «Дьулусханнаах сырыылаах Дохсун Ньургустай» диэн олоҥхотун аан бастакытын киэҥ эйгэҕэ таһааран толордо. Вера Егоровна олоҥхону 2006 сылтан суруйар, маны сэргэ иистэнэр, хоһоон суруйан холонор, үҥкүүлүүр, ыллыыр, оскуола, нэһилиэк олоҕор көхтөөх кыттыыны ылар Далбар хотун.
Вера Егоровна: «Мин бүгүн бэйэм суруйбут олоҥхобун аан бастакытын киэҥ эйгэҕэ таһааран музейга үйэтитиллэн уһулларбар күүс-көмө буолбут дьоммор, чуолаан нэһилиэгк аҕа баһылыгар Артем Гермонович Степановка, оскуола дириэктэригэр Иван Григорьевич Окоровка, кынат буолан көмөлөспүт коллегаларбар Надежда Михайловна Владимироваҕа, Венера Васильевна Даниловаҕа, Ирина Семеновна Слепцоваҕа, сиэммэр Родион Исаковка уонна олус истиҥник көрсүбүт Саха сирин норуоттарын муусукатын уонна фольклорун түмэлин дириэктэригэр Мария Ильинична Корниловаҕа уонна кини үлэһиттэригэр барҕа махталбын тиэрдэбин. Айымньылаах киһи сыралаах үлэтэ үйэтитиллэн хааларыгар түмэл дьоһуннах үлэни ыытарыттан олус диэн үөрдүм».