Саха сирин норуоттарын музыкатын уонна фольклорун түмэлэ бүгүҥҥү Саха Өрөспүүбүлүкэтин күнүнэн бар дьоммутугар итии-истиҥ эйэҕэс эҕэрдэтин тиэрдэр.
Ол курдук Арассыыйаҕа Дьиэ кэргэн сылынан биллэриллибит чэрчитинэн, айылҕаттан айдарыылаах Саха Өрөспүүбүлүкэтин норуотун эмчитэ, Саха Өрөспүүбүлүкэтин культуратын туйгуна, алгысчыт, арчыһыт, дьиэ кэргэн уйулҕаһыта — Софронова Татьяна Софроновна «Күн Саҕары», «Дьиэ кэргэн сиэрэ-туома» төгүрүк остуол тула кэпсэтиитэ буолла.
Татьяна Софроновна кэлбит ыалдьыттарга дьиэ кэргэҥҥэ туттуллар туомнары сырдатан, оҕо саастан бэйэни харыстаныыны сүбэлээн, ыал дьоҥҥо ытыктаһыы баар буолуохтааҕын бэлиэтээн, алаһа дьиэни ыраастаныы туһунан сиһилии кэпсээн, сырдатан биэрдэ. Кэпсэтии түмүгүнэн көрөөччүлэргэ алгыс тылынан арчылаан, ыраастаан дьон махталын, ытыктабылын ылан барда.
Үүнэр көлүөнэҕэ, эдэр ыччакка дьиэ кэргэн ытык өйдөбүлүн, күннээҕи олоххо туттуллар туомнары билиһиннэрии, ытыгылааһын, тарҕатыы бу биһиги сыалбыт-сорукпут буолар.