Салама ыйааһына – саха итэҕэлинэн айылҕаны кытары чугасыһыы, кэпсэтии, аар Айыыларга баҕа санааны тиксэрэр биир сүдү ньыма буолар. Үксүн саха дьоно салама туомун уһун тыйыс тымныы кыһын кэнниттэн, күөх окко үктэммит кэрэ кэмҥэ, ол эбэтэр сайылыкка көһүү кэмигэр оҥороллоро. Салама дьону харыстыыр, уйгу-быйаҥы иҥэрэр, үтүө олоҕу түстүүр суолталаах, аналлаах буолар.

Ол курдук биһиги түмэлбитигэр саалабыт халлар хаба ортотугар киэргэйэн, дьандайан турар Аал Луук маспытыгар  үгэскэ кубулутан салама ыйыыбыт. Бу манна ыраах-чугас сиртэн кэлбит ыалдьыттар, көрөөччүлэр бэйэлэрин баҕа санааларын, үтүө тылларын этэн тураннар, таҥас кырадаһынын сөрүөлүү иилэллэр.

Мантан сиэттэрэн эттэххэ аҥардас түмэлгэ кэлбит ыалдьыттарга эрэ буолбакка, биһиги “Көһө сылдьар түмэл”(Кочующий музей) бырайыакпыт чэрчитинэн араас дойдуга айаннаах, суоллаах буоллубут  да, ситии быалары илдьэ баран, сиэрбитин-туоммутун көрдөрө, сахабыт үгэстэрин билиһиннэрэ, атын дойду дьонун баҕа санааларын кырыс таҥаска тиһэн, саламаҕа ыйаттарабыт. Ол кэннэ, баҕа санаалаах саламабытын дойдубутугар илдьэ кэлэн, маспытыгар ыйыыр үтүө үгэскэ кубулуппуппут син балай да кэм буолла.

Ол курдук быйыл муус устар ыйга Казахстан өрөспүүбүлүкэтигэр  ыытыллыбыт Саха Сирин күннэрин культурнай тэрээһиннэрин чэрчитинэн Алмата куоракка Ыхлас аатынан норуоттар музыкальнай инструменнарын түмэлигэр көхтөөхтүк кыттан, элбэх тэрээһини ыытан кэллибит. Айан түмүгүнэн алгыстаах саламабытын илдьэ кэлэн, үгэс быһыытынан Аал Луук маспытыгар ыйаатыбыт.

Үтүмэн үгүс кэмнэргэ илдьэ сылдьар сахабыт сиэрин өлбөөдүйбэт-сүппэт үйэлээн, бар дьоҥҥо тарҕатыаҕын, кэпсиэҕин, иккис тыынна иҥэриэҕин!