Бүгүн муус устар 25 күнүгэр Карл Макс скверигэр Валерий Власьевич Ноев — саха аатырбыт айылҕаттан айдарыылаах хампаһыытарын аатын үйэтитэр ыллыыр ыскамыйа үөрүүлээх арыллыыта буолла.
Бу күн кини ырыаларын сэргээччилэр, сүгүрүйээччилэр, аймах-билэ дьоно ыллыыр ыскамыйа тула муһуннулар. Валерий Ноев ырыалара өлбөөдүйбэтин-сүппэтин туһугар, кэлэр кэнчээри ыччаппыт истэ-сэргии сылдьарыгар, тохтоон ааһар ыалдьыкка кэрэ алыптаах муусуката иһиллэ, дуораһыйа турарын туһугар баҕа санааларын, махталларын, инники былааннарын сэргээн, сырдатан аастылар.
Ол курдук эҕэрдэ эгэлгэтин, баҕа санаа бастыҥ тылларын кэлэн эттилэр: Валерий Ноев кыыһа-Саха Республикатын үөрэҕириитин туйгуна — Анастасия Валериевна Чирикова, кини быраата Саха Өрөспүүбүлүкэтин Сэрии бэтэрээннэрин сэбиэтин председателин заместителэ — Никита Никитич Ноев, Российскай Федерация суруналыыстарын Сойууһун чилиэнэ, Саха Өрөспүүбүлүкэтин суруйааччыларын Сойууһун чилиэнэ, Саха Өрөспүүбүлүкэтин ырыа айааччыларын-мелодистарын Сойууһун чилиэнэ, Саха Өрөспүүбүлүкэтин Култууратын туйгуна, САХА АССР Верховнай Советын норуодунай депутата, Саха Өрөспүүбүлүкэтин бастакы уонна үһүс ыҥырыылаах Государственнай Мунньаҕын (Ил Түмэн) норуодунай депутата — Михаил Семенович Санников, Российскай Федерация уопсай үөрэхтээһинин бочуоттаах үлэһитэ, Саха Өрөспүүбүлүкэтин үөрэҕэриитин туйгуна — Татьяна Иннокентьевна Березина, Саха сирин норуоттарын музыкатын уонна фольклорун түмэлин дириэктэрин солбуйааччытыгар — Майя Михайловна Максимова, мелодист, ырыа күнүн төрүттээччи, Саха сирин мелодистарын ассоциациятын председателя, Саха Өрөспүүбүлүкэтин норуодунай артыыһа, Саха Өрөспүүбүлүкэтин культуратын туйгуна – Алексей Кириллович Калининскай.
Айылҕаттан айдарыылаах хампаһыытарбыт Валерий Власьевич Ноев — кини тыыннаах алыптаах ырыалара үйэлэргэ умнуллубакка, дьон санаатыгар сөҥөн, иккис тыынын иҥэринэн үйэлэри уҥуордаан кэлэр кэнчээри ыччакка ыллана, дуораһыйа турдун.

#МузеймузыкиифольклоранародовЯкутии 

Сал5ыыта:https://t.me/sakha_muzey/2210