Бүгүн биһиги түмэлбитигэр Саха Өрөспүүбүлүкэтин норуотун маастара Раиса Николаевна Алексеева «Күн күлүмүн сапка тиһэбин» — диэн анал быыстапкатын үөрүүлээх арыллыыта буолла. Быыстапкаҕа кини олоҕун, үлэтин-хамнаһын үйэтитэр — кини оҥоһуктара, санаатын ууран иистэммит симэхтэрэ, сапка тиһэн таһаарбыт кэрэ көстүүлээх айымньылаах үлэлэрэ турдулар.
Быыстапка турарыгар сүүрбүт-көппүт сүрүн киһитинэн буолар СӨ культуратын үтүөлээх үлэһитэ, норуот маастара, “Уран” түмсүү салайааччыта — Миронова Ульяна Егоровна.
Ол курдук арыллыыга Раиса Николаевнаны истиҥник саныыр доҕордоро, атастара, бииргэ алтыһар дьоно-сэргэтэ кэлэн үөрүүлээх быһыыга-майгыга үтүө тыллаах эҕэрдэ тылларын этэн, махталларын биллэрэн, кини үлэтин сөҕөн-махтайан, сэргээн бардылар.
Быыстапка “Саха сирин норуоттарын музыкатын уонна фольклорун түмэлигэр” кулун тутар ый 14 күнүттэн 29 күнүгэр диэри туруоҕа. Киирии билиэт сыаната 100 солк. Түмэл сарсыарда 10 чаастан киэһэ 18:00 чааска диэри ыалдьыттары кэтэһэр. Кэлин, сылдьыҥ, сэргии көрүҥ!