Кулун тутар 15-16 күннэригэр Дьокуускай куоракка «Мас уустарын тойуга» диэн I Өрөспүүбүлүкэтээҕи мас уустарын күрэҕэ буолла. Манна Сахабыт сирин араас муннуктарыттан кырыымпа, чороон, сахалыы ох саа оҥорор мас уустара мустаннар бэйэлэрин икки ардыларыгар күрэхтэстилэр.
Тэрээһин үөрүлээх чааһыгар ытык-мааны ыалдьыттарынан Ил Түмэн бэрэссэдээтэлин бастакы солбуйааччы Александр Николаевич Жирков, СӨ Бырабыытылыстыбатын бэрэссэдээтэлин солбуйааччы Сергей Васильевич Местников, Ил Түмэн дьокутаата Иван Иванович Данилов, СӨ култуура уонна духуобунай сайдыы миниистирин I солбуйааччыта Мария Васильевна Турантаева уонна Арассыыйа норуодунай маастара, норуоттар икки ардыларынааҕы кылаастаах хомус ууһа, Арассыыйа уустарын сойууһун чилиэнэ Роман Ильич Готовцев буоллулар.

Күрэх мас уустарын сатабылларын сайыннарар, саха култууратын үйэтитэр, ыччаты төрүт дьарыкка сыһыарар сыаллаах ыытыллынна.
Кылыһах-кырыымпа хайысхатыгар кыайыылааҕынан Нам улууһуттан Андрей Осипов буолла. II миэстэни – Ньурба улууһуттан сылдьар Манчаары Ксенофонтов, III миэстэни Нам улууһуттан Руслан Захаров ылан сыаналаах бирииһинэн наҕараадаланнылар.

 «Дьүүллүүр сүбэ биһирэбилэ» диэн номинацияны Неустроев Семен Семенович (Амма),  «Эдэр кэскиллээх маастар» номинацияны Борисов Иннокентий Иннокентьевич (Дьокуускай),  «Сүгүрүйүү бэлиэтэ» бирииһи  Харайданов Алексей Дмитриевич (Таатта) ыллылар.

Манна эбэн эттэххэ, Кыл саха тэриллибитэ 10 сыллаах үбүлүөйүгэр аналлаах тэрээһиннэр чэрчилэринэн кырыымпа уустара уонна кырыымпаҕа оонньооччулар тустарынан каталог бэлэмнэнэр. Бу үлэ хаамыытынан түмэл үлэһиттэрэ маастардары видеоҕа устан каталокка матырыйааллары бэлэмнээтилэр.